శ్రీ కృష్ణ విజయము - 92

( కంససోదరుల వధ )

10.1-1384-క.

చేతులఁ దాళము లొత్తుచుఁ

జేతోమోదంబుతోడ సిగముడి వీడం

బాతర లాడుచు మింటను

గీతము నారదుఁడు పాడెఁ గృష్ణా! యనుచున్.

10.1-1385-క.

వారిజభవ రుద్రాదులు

భూరికుసుమవృష్టిఁ గురిసి పొగడిరి కృష్ణున్

భేరులు మ్రోసెను నిర్జర

నారులు దివి నాడి రధిక నటనముల నృపా!

భావము:

నారదమహర్షి చేతులతో తాళాలు వాయిస్తూ జుట్టుముడి వీడిపోగా, ఆనందంతో ఆకాశంలో “కృష్ణా!” అంటూ పాడుతూ నర్తించాడు. పరీక్షన్నరేంద్రా! బ్రహ్మదేవుడు, శివుడు మొదలైన దేవతలు కొల్లలు కొల్లలుగా పూలజల్లులు కురిపిస్తూ శ్రీకృష్ణుడిని స్తుతించారు. దేవదుందుభులు మ్రోగాయి. దేవతాంగనలు ఆకాశంలో అనేక రకాల నాట్యాలు చేశారు.

http://telugubhagavatam.org/?tebha&Skanda=10.1&Ghatta=164&padyam=1385

: : భాగవతం చదువుకుందాం : : 

: : తెలుగులో మాట్లాడుకుందాం : :