జానకీ రమణ కళ్యాణ....

రచన: శ్రీ భక్త రామదాసు
రాగం: కాపి 
తాళం: త్రిపుట

పల్లవి:
జానకి రమణ కళ్యాణ సజ్జన
నిపుణ కళ్యాణ సజ్జన నిపుణ ॥జానకి ॥

చరణములు:
ఓనమాలు రాయగానే నీ నామమే తోచు
నీ నామమే తోచు శ్రీరామా ॥ 1 ॥

ఎందు జూచిన నీదు అందమే గానవచ్చు
అందమె గానవచ్చు శ్రీరామా ॥ 2 ॥

ముద్దు మోమును చూచి మునులెల్ల మోహించిరి
మునులెల్ల మోహించిరీ శ్రీరామా ॥ 3 ॥

దుష్టులు నినుజూడ దృష్టి తాకును ఏమో
దృష్టి తాకును ఏమో శ్రీరామా ॥ 4 ॥

ఎన్ని జన్మలెత్తిన నిన్నే భజింప నీవె
నిన్నే భజింప నీవే శ్రీరామా ॥ 5 ॥

ముక్తి నే నొల్ల నీదు భక్తి మాత్రము చాలు
భక్తిమాత్రము చాలు శ్రీరామా ॥ 6 ॥

రాతి నాతిగజేసె నీ తిరువడిగళె కాదా
నీ తిరువడిగళె కాదా శ్రీరామా ॥ 7 ॥

నారదాది మునులు పరమపద మందిరిగద
పరమపద మందిరిగా శ్రీరామా ॥ 8 ॥

సత్య స్వరూపముగ ప్రత్యక్షమై నావు
ప్రత్యక్షమై నావు శ్రీరామా ॥ 9 ॥

భద్రాచల నివాస పాలిత రామదాస
పాలిత రామదాస శ్రీరామా ॥ 10 ॥